Nanguna ang Reserve Officers’ Training Corps (ROTC) Unit ng Romblon State University (RSU) sa MIMAROPA Region matapos sumailalim sa kauna-unahang Regional Annual Administrative and Tactical Inspection (RAATI).
Isinagawa ang RAATI alinsunod sa Department of National Defense Circular No. 09, s. 2022, na naglalaman ng implementing guidelines ng Republic Act No. 9163 o NSTP.
Ang ebalwasyon ay isinagawa ng mga kinatawan ng Philippine Army sa ilalim ng 2nd Infantry Division, na siyang itinalagang evaluation team para sa mga ROTC unit sa CALABARZON at MIMAROPA. Ang mga ROTC unit ay pinamamahalaan ng Philippine Army Reserve Command sa pamamagitan ng mga regional community defense groups.
Ang RAATI ay isinagawa sa RSU San Agustin Campus sa pangunguna ni Campus Director Dr. Poly Banagan, kasama sina NSTP Director Forester Edgar V. Andalecio at Lt. Col. Jonathan M. Escopalao, Commandant ng ROTC at Director ng 1705th Community Defense Center.
Nahati ang inspeksyon sa administrative inspection at field test. Sa administrative component, nakapagtala ang RSU ng 195.3 puntos mula sa 200. Sa field test naman, umabot sa 770.3 puntos mula sa 800 ang nakuha ng unit.
Sa kabuuan, nakapagtala ang RSU ng 965.6 puntos mula sa 1,000 o katumbas ng 96.56 porsyento, na siyang pinakamataas sa MIMAROPA Region.
Pinangunahan ang inspeksyon ni Colonel Virginio C. Hamos Jr. ng Office of the Assistant Division Commander for Reservist and Retiree Affairs ng 2nd Infantry Division, Philippine Army, kasama ang evaluation team.
Ang ROTC unit ng RSU ay naitatag noong 2022 at sumailalim sa RAATI matapos ang ilang taong paghahanda at implementasyon ng programa.
