Dalawang Romblomanon ang pumasok sa Top 10 ng July 2025 Real Estate Appraisers Licensure Examination matapos makakuha ng mataas na marka sa isinagawang pagsusulit ng Professional Regulation Commission (PRC).
Pumuwesto sa ika-walo si Martino Guntan Belano III matapos makakuha ng 88% na rating. Si Belano ay isang Certified Public Accountant (CPA), Licensed Professional Teacher (LPT), at Real Estate Broker (REB). Kasalukuyan siyang nanunungkulan bilang State Auditor IV sa Commission on Audit (COA) at nakatalaga bilang Audit Team Leader sa Romblon State University (RSU). Isa rin siyang alumnus ng BS Accountancy, Batch 2010 ng RSU.
Samantala, pumuwesto naman sa ika-siyam si Ellen Mae Murillo Cartujano mula sa bayan ng Looc, Romblon matapos makakuha ng 87.5% rating. Nag ranked #9 na rin si Cartujano sa April 2025 Real Estate Brokers Licensure Examination.
Batay sa ulat ng PRC, 968 sa 1,356 ang pumasa sa naturang licensure exam na isinagawa sa iba't ibang testing centers sa bansa tulad ng NCR, Baguio, Butuan, Cagayan de Oro, Cebu, Davao, Iloilo, Legazpi, Lucena, at Tacloban.
Ang pagsusulit ay isinagawa ng Board of Real Estate Service sa pangunguna ni Hon. Ofelia C. Binag, Chairperson; at mga miyembrong sina Hon. Rafael M. Fajardo, Hon. Jose Arnold M. Tan, at Hon. Pilar M. Torres-Banaag.
Ang resulta ng exam ay inilabas sa loob lamang ng dalawang araw matapos ang pagsusulit.
