Natagpuang walang buhay kagabi, June 12, ang isang grade 2 pupil sa Barangay Poblacion, Magdiwang, Romblon matapos itong malunod sa ilog sa lugar.
Ayon sa ulat ng Magdiwang Municipal Police Station, nakatanggap sila ng ulat na nawawala si Nelsie Ann Rabino Balse, 8, matapos maligo kasama ang kanyang mga pinsan sa riverbank malapit sa lugar bandang alas-3 ng hapon.
Wala umanong paalam na naligo ang mga bata sa kanilang mga magulang.
Sa kwento ng kasama nito na naligo, tumalon umano si Balse sa malalim na bahagi ng ilog ngunit hindi na umahon pa. Sa takot ng pinsan nito na mapagalitan, hindi ito nagsumbong na nawawala sa ilog ang bata hanggang mapansin ng kanyang mga kamag-anak kinagabihan na hindi pa ito nakakauwi.
Bandang 10:30 na ng gabi nang matagpuan ang walang buhay na katawan ng bata matapos ang isinagawang search and rescue mission ng Magdiwang Municipal Police Station kasama ang mga force multipliers sa lugar.
