‘Talakayan kontra COVID-19: Senior Citizens, Bida sa Bakuna.’ Ito ang tema sa isinagawang virtual conference sa pamamagitan ng Zoom kamakailan na pinangunahan ng Department of Health (DOH) kung saan iniulat na nasa halos 200k na ang mga nabakunahang pangunahing mamamayan sa rehiyon.
Tinalakay ni Medical Officer III, Dr. Matthew Medrano, M.D. ang bilang ng mga nabigyan ng unang bakuna mula sa kategoryang A1-A5 na naitala noong Nobyembre 12 ay 857,977 habang ang naka kumpleto ng bakuna ay nasa 808,267. Sinabi ni Medrano, “Sa 857,977 na nabigyan ng unang bakuna, 92,278 dito ay mga Senior Citizens o 34% lamang ito ng aming target ang nabakunahan habang sa 808,267 ay 104,297 na ang nabakunahan o 39% sa aming inaasintang bilang.”
Ang mga bakunang itinurok anya sa mga nakatatandang mamamayan ay Sinovac, AstraZeneca, Moderna, Pfizer, Johnson & Johnson’s (J&J) Janssen at Gamaleya Sputnik.
Ipinaliwanag pa ng dalubhasa na ang mga bakuna ay masusing pinag-aralan at dumaan sa tamang proseso bago ito iturok sa tao. Dalawang pagsusuri ang pinagdaanan nito; una ang kaligtasan ng bakuna. Ito ay dumaan sa Pre-Clinical Trial kung saan ang inisyal na pagsusuri ay ginamit ito sa hayop.
Sumunod ang Phase 1 na ginamit na ito sa tao upang malaman kung ito ba ay mayroong masamang epekto. Sa Phase 2 ay demographic side effect o kung epektibo ba ang dami na itinurok at Phase 3 ay monitoring, kung ito ba ay may masamang epekto sa kalusugan ng tao.
Ikalawang bahagi ng pagsusuri ay kung mabisa ba ang bakuna. Kailangan itong dumaan sa Center for Disease Control and Prevention (CDC), sa World Health Organization (WHO) at sa Food and Drug Administration of the Philippines (FDA) para ituring na Emergency Use Authorization (EUA) o ang pagpapahintulot na isyuhan ang mga hindi rehistradong gamot at bakuna upang magamit sa oras na kailanganin ng publiko base na rin sa Executive Order No. 121 ng Pangulo ng Pilipinas na ipahintulot ang pagbibigay ng EUA.
Samantala, ipinaliwanag ni DOH Mimaropa Health Education Promotion Officer (HEPO) Romalyn Racho ang mga kahalagahan ng pagiging bakunado kontra COVID-19 gayundin ang mga pamamaraang pag-iingat laban sa nakamamatay na virus tulad ng pagsusuot ng face mask at face shield sa tuwing lalabas ng bahay, palagiang paghuhugas ng kamay at pagpahid ng alcohol at ang pag agwat sa katabi na may isang metro ang pagitan.
Ibinahagi din ni Racho na “kahit hindi lumalabas si lolo at lola sa bahay ay maari pa itong mahawa dahil sa mga kamag-anak o kaibigan na galing sa labas ay maaring may dala itong virus na hindi nakikita kaya napakahalaga na ang ating mga senior citizens ay protektado sa pamamagitan ng pagpapabakuna.”
Ang nasabing virtual conference ay dinaluhan ng nasa humigit-kumulang 60 partisipantes mula sa buong lalawigan na kinabibilangan ng mga pangulo ng pederasyon ng mga nakatatandang mamamayan, pangulo ng senior citizen sa barangay, mga pinuno ng Office of the Senior Citizens Affairs (OSCA) at si Oriental Mindoro Provincial Social Welfare and Development Officer, Gng. Zarah Magboo na nagbigay ng panghuling pananalita.
