Nagpapatupad na ng total lockdown sa bayan ng San Jose sa Carabao Island, Romblon alinsunod sa utos ni Governor Jose Riano kasunod ng pagkumpirma ng DOH Center for Health Development – MIMAROPA (CHD-Mimaropa) sa unang positibong kaso ng Covid-19 sa bayan, at sa buong Romblon.
Sa recorded message ni Governor Riano na ipinalabas sa kanyang opisyal na Facebook page, sinabi nito na nag-utos na siya ng lockdown para wala ng lalabas at papasok sa munisipyo ng San Jose.
“Nag-utos na tayo ng total lockdown sa San Jose, Romblon. Ipinagutos natin na wala ng papasok at lalabas sa munisipyo ng San Jose simula ngayong araw. Suspendido na rin ang biyahe ng mga estudyante, stranded persons at displaced workers habang inaayos natin ang mga bagong guidelines na naayon sa pangangailangan ng San Jose at ng probinsya ng Romblon dahil sa pagkakaroon ng positive covid case,” ayon sa Gobernador.
Nag-utos na rin umano ang Gobernador ng contact tracing para mahanap ang mga taong nagkaroon ng contact sa pasyente para mabigyan ng kaukulang payo at check-up.
Nakiusap rin ang gobernador sa lahat ng lumabas ng San Jose, may permit man o wala, na magkusang makipag-ugnyan sa mga Barangay Health Emergency Response Team o sa Barangay upang mas mapadali ang contact tracing na ginagawa ng mga Rural Health Unit.
“Ito ay hindi lang para sa inyong kapanakanan, kundi para sa kapakanan ng ating mga kababayan,” dagdag ng Gobernador.
Ang mga alkalde rin umano sa ibang munisipyo ay tinawagan na ng gobernador para mas paigtingin ang pagpapatupad sa mga bagong guidelines sa kanilang mga munisipyo.
Samantala, hiniling rin ng gobernador na magkaisa ang publiko sa paglaban sa Covid-19 sa probinsya at sa buong mundo.
