‘No Comment' muna umano si Dr. Ben Anatalio, hepe ng Romblon Provincial Hospital, patungkol sa mga reklamong natatanggap ng opisina ni Odiongan Vice Mayor Mark Anthony Reyes na naka-post sa personal facebook account ng bise-alkalde.
Ito ang sinabi ni Anatalio ng mabilisang makapanayam ng Romblon News Network nitong Miyerkules ng umaga pagkatapos ng State of the Municipality Address ni Odiongan Mayor Trina Alejandra Firmalo-Fabic sa Odiongan Public Market.
Aniya, hindi pa naman niya umano nababasa ang mga post ni Vice Mayor Reyes kaya hindi pa siya makakapagbigay ng mga pahayag.
Pinasinungalingan rin nito ang balitang may limang consultant ang Romblon Provincial Hospital na hindi pumapasok sa trabaho pero sumasahod, aniya, kung hindi sila pumapasok ay paano nakakapag-opera ang mga ito.
Ilan lamang sa mga reklamo na lumabas sa social media kasunod ng mga posts ni VM Reyes ay ang kakulangan di umano ng Doctor, ang maduming mga CR ng ospital, ang pag-serve ng pagkain na nakalagay sa cellophane, at iba pa.
