“Ngayong nalalapit na ang panahon ng kampanyahan, nakalatag na po ang aming planong pang seguridad para sa darating na National at Local Elections sa Mayo 9.”
Ito ang ipinahayag ni PBGen Nelson B Bondoc, Police Regional Office (PRO) Regional Director ng Mimaropa sa isinagawang press conference sa tanggapan nito sa Camp Efigenio C Navarro sa lungsod na ito kamakailan.
Ayon kay Bondoc, magsisimula ang panahon ng halalan sa unang araw ng kampanyahan ngayong bagong taon, Enero 9 hanggang Hunyo 8. Sa mga panahong ito ay ipinagbabawal na ang pagdadala ng baril sa labas ng tahanan maliban kung ito ay may kaukulang permiso mula sa tanggapan ng Commission on Election (COMELEC).
Hindi pa man nagsisimula ang gun ban ay pinaigting na ng kapulisan ang pagsasagawa ng mga checkpoint at chokepoint operation sa mga lansangan at walang humpay na pagpapatrolya sa mga lugar na itinuturing na talamak ang krimen. Kasabay din na ipinatutupad sa mga checkpoints ang ‘Oplan Bakal/Oplan Sita’ upang maiwasan anya ang paglipana ng mga motorcycle riding criminals na nambibiktima ng taongbayan.
Dagdag pa ng direktor, “Sa kasalukuyan, sapat ang bilang na 6,688 na unipormadong pulis na nakatalaga sa rehiyon ayon sa aming Regional Personnel and Records Management Division at sa Regional Operations Division na kung saan 520 mamamayan ang binabantayan ng isang pulis na malapit na sa pinupuntiryang normal na bilang na 500 katao bawat isang pulis.”
Samantala, hinggil sa itinuturing na ‘areas of immediate concern' o mga lugar na mainit ang pulitika ay kanila aniyang binabantayan ang lungsod ng Puerto Princesa at munisipalidad ng Narra na nasa lalawigan ng Palawan at 15 pang lugar sa Mimaropa na siyang pinaghahandaan ng kapulisan upang maging mapayapa, tahimik at gawing ligtas sa darating na halalan.
Tungkol naman aniya sa mga pulis na kasalukuyang bantay ng mga pulitiko, lahat na naka-detail sa mga pulitiko ay kanila aniyang ire-recall o ibabalik na sa kanilang pinanggalingang unit. Mayroon naman Police Security and Protection Group (PSPG) na kung saan ay maaring humiling ng bantay ang isang pulitiko kung may pahintulot ang Comelec.
“Ngayong 2022, ang mandato ng punong kapulisan sa pamumuno ni Poilice Director General (PDG) Dionardo Carlos ay gawing ligtas, maayos at mapayapa ang darating na pambansa at lokal na halalan ngayong Mayo at patuloy pa rin ang pagpapaigting ng kampanya laban sa iligal na droga, pagkumpiska sa mga hindi lisensiyadong armas, kriminalidad, insurhensiya at aktibong patisipasyon ng kapulisan sa paglaban sa COVID-19 pandemic lalo na ang pagkakaroon nito ng ibang variant,” pagtatapos na mensahe ni Bondoc.
