Isang pasyente na may mahigit ₱100,000 na natitirang hospital bill ang natulungan at hindi na pinabayaran matapos ang inisyatiba ng Isiah Hospital sa pangunguna ng CEO nito na si Diven Dimaala.
Sa video na inupload sa social media ni Dimaala, ibinahagi ng kamag-anak ng pasyente na sumailalim nga ang huli sa operasyon kung saan naputol ang kanyang braso dahil sa bone cancer at siyam na araw na nanatili sa ospital.
Umabot sa mahigit ₱200,000 ang kabuuang bill ng pasyente, ngunit sa tulong ng iba’t ibang ahensya ng pamahalaan ay nabawasan ito hanggang ₱102,000.
Sa kabila nito, kinailangan pa umanong magbenta ng kalabaw ang pasyente upang makadagdag sa pambayad sa ospital. Ang pasyente ay isa ring single parent.
Sa huli, pinasya ng pamunuan ng ospital na tuluyang i-waive ang natitirang balanse upang matulungan ang pasyente sa kanyang pinansyal na sitwasyon.
Ayon kay Dimaala, bahagi ito ng kanilang patuloy na pagsisikap na makatulong sa mga pasyenteng nangangailangan, lalo na sa mga may mabibigat na kondisyon at limitadong kakayahang pinansyal.
Discussion about this post