Arestado ang isang negosyante sa Odiongan, Romblon matapos umano itong manutok ng baril at magbanta laban sa ilang residente sa Barangay Batiano nitong Huwebes ng umaga.
Batay sa ulat ng pulisya, nagtungo ang suspek sa tahanan ng mga biktima at galit umanong nagbanta na papatayin ang isa sa kanila kapag nagkita sila. Pagdating ng lalaking biktima, na siya umanong pinagbabantaan, bigla raw bumunot ng baril ang suspek at itinutok ito sa lalaki, dahilan para umatras at umatras ito sa takot.
Hindi lamang ang nakatatandang biktima ang target umano ng pananakot, dahil ayon sa mga bitima, tinutukan din umano ng suspek ang apat na menor de edad na nakasaksi sa insidente at inutusan pa umanong tumakbo palayo.
Matapos itong kausapin ng isa pang biktima na nakatira din sa bahay, umalis ang suspek sakay ng motorsiklo.
Agad namang nagsumbong sa mga barangay opisyal at pulisya ang pitong biktima, kasama ang apat na menor de edad.
Dahil dito, nagsagawa ng hot pursuit operation ang mga awtoridad at nahuli ang suspek. Narekober din mula sa kanya ang isang baril, magazine, at mga bala.
Kasalukuyan siyang nakakulong at sasampahan ng mga kasong may kinalaman sa grave threats.
Discussion about this post